Bimbingen Bahan PA Mamre, 8 – 14 Maret 2020

Jadi Usihen I Bas Erdahin – Peningkatan Ekonomi Melalui TI (Teknologi Informasi)

Si Man Ogen
2 Tesalonika 3: 6 – 10

(3:6) Tetapi kami berpesan kepadamu, saudara-saudara, dalam nama Tuhan Yesus Kristus, supaya kamu menjauhkan diri dari setiap saudara yang tidak melakukan pekerjaannya dan yang tidak menurut ajaran yang telah kamu terima dari kami.
(3:7) Sebab kamu sendiri tahu, bagaimana kamu harus mengikuti teladan kami, karena kami tidak lalai bekerja di antara kamu,
(3:8) dan tidak makan roti orang dengan percuma, tetapi kami berusaha dan berjerih payah siang malam, supaya jangan menjadi beban bagi siapapun di antara kamu.
(3:9) Bukan karena kami tidak berhak untuk itu, melainkan karena kami mau menjadikan diri kami teladan bagi kamu, supaya kamu ikuti.
(3:10) Sebab, juga waktu kami berada di antara kamu, kami memberi peringatan ini kepada kamu: jika seorang tidak mau bekerja, janganlah ia makan.

PA Mamre dilaksanakan hari Kamis, 12 Maret 2020.
⏰ : 19.00 WIB
📌 : “Jadi Usihen I Bas Erdahin”
📖 : 2 Tesalonika 3 : 6 – 10

T u j u n : Gelah Mamre

  1. Meteh maka Paulus tutus ras mejingkat erdahin guna man usihen perpulungen
  2. Alu tutus ras erbintuas ndahiken dahinna guna keluarga ras si enterem
    Metode PA : Sharing ras Aksi

KATA PENARUH
Lit sada isitilah si megati ipakeken adi ercakap kerna “Jadi usihen i bas erdahin”, e me kata “etos kerja”. Alu gendek, banci ikataken maka etos kerja e me palas perukuren, semangat ras cara erdahin ta. Enda pe jadi penjemba si megegehna lako mabai kita guna erdahin sue ras keperlunta bage pe sentudu ras kebenaren Kata Dibata. Tole pe, lako terbagesen si pepayo etos pendahin e, Samuel H. Tirtamihardja nuratken maka nina lit kap unsur-unsur si penting si arus lit i bas dirinta gelah banci kita ndahiken pendahinta e alu mehuli janah ndatken ulih, e me:
• 5% kiningitenta guna erdahin (availability)
• 5% banci ncibalken dirina ntah pe menyesuaikan diri (adaptability)
• 10% kengasupen (ability)
• 10% penamplnenna (appearance)
• 70% sikap ntah pe orat nggeluhna si mehuli (attitude).

Dage, si mbelinna i je eme sikap ntah pe orat nggeluhta si mehuli sabab bicara kuga gia hebatna pemetehta, beluh pe kita ncibalken dirinta, rikut pe ras lit gegeh kengasupennta bage pe metunggung ka penampilenta tapi orat nggeluh ta la mehuli tentu labo kasa kai kalak si ermeriah ukur nandangi pendahinta e.

URAIAN
Surat Paulus sipeduaken man perpulungen i Tesalonika ituliskenna guna ngelayasi kebingungen kalak Kristen paksa si e kerna kerehen Kristus sipeduakaliken. Lit si erpendapat maka kerehenNa sipeduakaliken e enggo kap seh. E maka isuriangi Paulus alu ngataken maka pendapat e lepak, sebab sope Kristus reh mulihken ku doni enda, kekejamen ras kejahaten i doni enda mekelek kal khususna kalak si menentang Kristus. ltekanken Paulus maka kerina perpulungen e perlu kal ertahan i bas kinitekenna man Kristus gia pe ia nggeluh i bas kiniseran bage pe perbeben si mberat. Paulus mereken pedahna maka kerina ia tetap erdahin guna keperlun geluhna (mencari nafkah mereka) bagi siilakoken Paulus ras teman-temanna bage pe tetap erbahan si mehuli.

Rikutken ogen PA nta, 2 Tes. 3:6-10, banci si siksiki pe piga-piga hal, e me :
Erpalasken ayat 6 – 7
Siipersingeti Paulus ijenda e me kerna si perkisat e me kalak si la ngelakoken pendahinna ntah pe yang tidak melakukan pekerjaannya e me perpulungen si malas ras la nggit erdahin. Kalak si bage pe nianggap sebagai sekalak si bermalas-malasan ras pe la ngergaken kegeluhen kalak si tutus erdahin (bnd. 1 Tes 4:9-10). Kalak si bagenda perlu ibereken sanksi ntah pe displin man bana alu nirangisa sebab enggo nge iajarken Paulus ia guna tutus erdahin bagi siiajarken Paulus rikutken 1 Tesalonika 2:9, “O senina-senina, tentu ingetndu denga kelatihen kami erdahin! Erdahin kami suari ras berngi gelah ola kami jadi tanggungenndu kidekah kami meritaken Berita Si Meriah si rehna i bas Dibata nari man bandu”. Si bagenda me arusna siibahan perpulungen e.
Erpalasken ayat 8
Pengajaren Paulus e ituduhkenna alu bukti i bas kegeluhenna, ija ia pe tetap erdahin alu latih suari ras berngi gelah ola lit siiberati Paulus gia pe ia ndahiken pendahin Tuhan. Tapi, ola kita lupa kondisi perpulungen paksa si e tuhu-tuhu mesera baban geluhna. La sitik kalak si mekisat erdahin paksa si e erkiteken alasen maka kerehen Kristus sipeduakaliken e jadi alasen lanai erdahin sabab tading me pagin kerina. Tapi Paulus enggo nuduhken si man usihen perpulungen e alu ndahiken pendahin selaku sekalak si erbahan tenda (Perb. Rasul 18:3)
Erpalasken Ayat 9 – 10
Kerina siilakoken Paulus e tujunna lako banci jadi usihen ntah pe jadi teladan man kalak Tesalonika, khususna si mekisat erdahin janah erbahan alasen maka la ia nggit erdahin erkiteken wari kerehen Kristus enggo ndeher me janah kerinana nge pagin itadingken i bas doni enda. Erkiteken Paulus pe man arah ulih pencarinna e maka ikatakenna pe rusur gelah “Kalak si la nggit erdahin ola bere man.”

APLIKASI
Mentalitas si mehuli si perlu ikembangken bas kegeluhen jabu-jabu Mamre GBKP e me nggit erdahin gia kai pe bentuk pendahin e, asal sue ras si ngena ate Tuhan. Enda nuduhkenca maka Mamre GBKP menggantungken kegeluhenna ku pemasu-masun Tuhan arah ulih pencarin ras pendahinna. Biak kalak si tutus erdahin e me tetap mesikel guna memajuken usaha pencarin bage pe pendahinna. langkaina pe alu payo maka rejeki e rehna arah kininggiten erbahan kreatifitas ras la mela guna erdahin.

La lit kai pe jenis pendahin si man kemelanken dikune siidahiken kita e guna mpermuliaken Tuhan bage pe mabai ulih subuk man banta bage pe man kalak si deban. Tapi, si jelas kalak perkisat labo banci meningkat ekonomina. Erkiteken si e, meterudu lah min kita guna ndarami peluang-peluang i bas meningkatken ekonominta i bas kemajun zaman e. Tapi, ola ka kita lupa gelah i bas nggeluhken kegeluhen jabu-jabunta tetaplah si pakeken kepentaren ntah pe hikmat i bas membangun tatanan kehidupan ntah pe aturen-aturen kegeluhen ku si terulin e.

Mari dage gelah kerina kita Mamre GBKP alu tutus ras erbintuas ndahiken dahinta guna kemulian Tuhan, ulihna guna kepentingen keluarga ras si jelma enterem. Mamre GBKP arus mengayak kempak kegeluhen si jadi usihen kalak si deban, khususna i bas dampar usaha, pencarin ras pendahin. Erlajarlah Mamre maka banci kreatif i bas makeken ulih perkembangen Teknologi informasi (TI) enda, umpamana : makeken media online i bas memasarken ntah pe ndayaken binaganta. Bage pe banci ka makeken media google guna erlajar ngelakoken sada pendahin. Atan pe alu erbahan jaringan kerjasama si saling menguntungken sada ras si debanna. Bage pe mbue ka si deban si lakoken tapi arus tetap guna kemulian Tuhan.

SHARING RAS AKSI
La lit kai pe alasen si erbahanca Mamre la erdahin, subuk pe e kerna kerehen Kristus sipeduakaliken e sebab arah pendahin e kita enggo ndemi pendilonta guna tetap erdahin. Kerna ulihna, tentu tek kita Tuhan Dibata nta lebih meteh kerna si e.

  1. Mari si sharingken selaku Mamre GBKP si Erdiate sada nandangi si debanna, kerna kegiaten bersama si banci si lakoken i bas kita ndahiken pendahin bage pe usaha pencarinta maka reh teremna Mamre GBKP si maju bas erkiniteken, jabu, bage pe usaha pencarin.
  2. Mamre GBKP kalakna nggit Erpemere i bas kegeluhenna, sabab tujur, siilakokenna e me guna kemuliaan Tuhan. Aksi kai nge si banci ilakoken Mamre nandangi anak-anakta si langa erdahin seh i bas paksa enda ? Mari si lakoken.

Pdt. Agustinus Ginting Manik, M.Th