Bahan PJJ 13 – 19 Juni 2021

NGGELUH METEH ORAT

(Budaya/Orat Nggeluh)

1 Timotius 5: 1 – 8

Mengenai saudara-saudara seiman
5:1 Janganlah engkau keras terhadap orang yang tua, melainkan tegorlah dia sebagai bapa. Tegorlah orang-orang muda sebagai saudaramu,
5:2 perempuan-perempuan tua sebagai ibu dan perempuan-perempuan muda sebagai adikmu dengan penuh kemurnian.

Mengenai janda
5:3 Hormatilah janda-janda yang benar-benar janda.
5:4 Tetapi jikalau seorang janda mempunyai anak atau cucu, hendaknya mereka itu pertama-tama belajar berbakti kepada kaum keluarganya sendiri dan membalas budi orang tua dan nenek mereka, karena itulah yang berkenan kepada Allah.
5:5 Sedangkan seorang janda yang benar-benar janda, yang ditinggalkan seorang diri, menaruh harapannya kepada Allah dan bertekun dalam permohonan dan doa siang malam.
5:6 Tetapi seorang janda yang hidup mewah dan berlebih-lebihan, ia sudah mati selagi hidup.
5:7 Peringatkanlah hal-hal ini juga kepada janda-janda itu agar mereka hidup dengan tidak bercela.
5:8 Tetapi jika ada seorang yang tidak memeliharakan sanak saudaranya, apalagi seisi rumahnya, orang itu murtad dan lebih buruk dari orang yang tidak beriman.

Lagu langkah kalak Kristen
5:1 Ola rawai kalak si umurna tuan asangken kam, tapi beluhlah min kam muat ukurna, bahan ia tempa-tempa bagi bapandu. Kalak si nguda bahanlah bagi agindu.
5:2 Diberu si enggo metua bahanlah bagi nandendu, janah man diberu si nguda denga arus bersih lagu langkahndu, janah bahanlah bagi turangndu.

5:3 Mehamatlah kam nandangi diberu-diberu si enggo mbalu si lanai ersima-sima.
5:4 Tapi adi sekalak si enggo mbalu lit anakna ntah kempuna, anak ntah kempuna e lah lebe nehken tanggung jababna man keluargana e. I bas si e ersimulih ia man orang-tuana bage pe man ninina, sabap si enda me si ngena ate Dibata.
5:5 Diberu si tuhu-tuhu enggo mbalu, si lanai lit sima-simana, ia erpengarapen man Dibata. Ertoto ia man Dibata suari ras berngi mindo penampat.
5:6 Tapi diberu si enggo mbalu si nggeluh guna pesenangken dirina saja, ia enggo mate aminna pe ia nggeluh denga.
5:7 Pesehlah bana ajar enda gelah ia nggeluh alu la erpandangen.
5:8 Adi lit si la mperdiateken kade-kadena, terlebih-lebih keluargana, enggo ipersokenna kinitekenna. Jahaten me ia asangken kalak si la tek man Jesus Kristus.

PERSIKAPEN

• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen ras pertoton syafaat
• Adi i bas sektor entah jabu kepkepen perdalanen PJJ ibabai Pt Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
• Kerina perdalinenna rikutken situasi janah banci iubah (imodifikasi).
• Sope benaken PJJ banci kita rende Lagu KAKR

RENDE: KEE. 185 – “DIBATA BAPANTA”

Dibata Bapanta ringan i surga
Si njaga geluhta i pertibi e
Ernalem man baNa i bas geluhta
Ikutken kataNa, suari berngi pe
I bas k’rina paksa kegeluhen
Pemere Dibata cukup banta pe
Kuga dage ninta man Dibatanta
Si pindo man baNa ola erleka

ERTOTO

NGOGE KATA DIBATA:
Teks: 1 Timotius 5: 1-8

RENUNGEN

Tema: Nggeluh Meteh Orat (Etika Hidup Menurut Budaya Karo) Lit kata-kata si pernah terbegi eme: kalak si rotak eme kalak si rorat, nggit ia morat emaka geluhna labo rarat. Rikutken kata-kata enda maka oratna manusia nggeluh meteh orat sabab Dibata enggo mereken otak kempak manusia. Perukuren, pengerana, pendahin ras perbahanen banci mereken ulih ras nanam man kalak si deban. Senang dingen malem ate kalak si deban. Ula rarat, si banci peturah gara rawa dingen aru ate i bas kalak si deban erkiteken ngerugiken dingen peturah nembeh ate.

I bas ogenta 1 Timotius 5:1-8, rasul Paulus nggambarken maka ngawan ni perpulungen desken sada keluarga si erbage kebiasan ras umur lit ije emaka isenaken kerna orat geluh (Ind. etika hidup) kalak Kristen eme:

• Ola rawai kalak si tuan asangken kita tapi beluhlah muat ukurna, bahan tempa-tempa jadi bapa
• Kalak si nguda bahan bagi agi
• Diberu si enggo metua bahan bagi nande
• Kempak diberu si nguda denga arus bersih lagu langkah janah bahanlah bagi turang
• Mehamat nandangi diberu-diberu si enggo mbalu dingen la ersima-sima
• Anak dingen kempu si enggo mbalu nehken tanggung jababna. Ersimulih ia man orang tua ras man nini.
• Diberu si enggo mbalu dingen la ersima-sima erpengarapen dingen ertoto tetap man Dibata
• Mperdiateken kade-kade terlebih-lebih keluarga.

Orat geluh enda mabai kalak ernanam man kalak si deban. Ietehna tanggung jababna dingen menahang ukurna nampati dingen pekena-kena kalak si deban. Jenari isingetken pe maka kalak si la rorat geluhna eme nggeluh guna kesenangen dirina dingen la nggit mperdiateken kalak si deban terlebih-lebih keluargana.

Filosofi kalak Karo eme mehamat er-kalimbubu, medes er-senina ras metami er-anak beru. Mehamat er-kalimbubu ertina nghamati, ngergaken ajar ntah pe pedah kalimbubu. Enda icidahken arah ketutusen erdahin, bujur, nggit erkorban waktu ras gegeh bage pe kinipangen ngkawali ras mpertahanken gelar mehuli kalimbubu. Medes er-senina ertina nggit mperdiateken senina, meneken biak erbana-bana, la meganjang rukur, la pejago-jagoken bana ras la nggit mpekitik seninana. Metami er-anak beru ertina sabar janah idarami rusur si erbahan anak beru ermengkah ate ras megegeh ndalanken dahin-dahin anak beru. Jenari mereken pujin man anak beru erkiteken dahin si mberat enggo ilayasina. Bage pe mereken pasu-pasu si mpegegehi anak beru.

I bas kalak Karo pe lit ituriken kerna orat geluh (sumbang si siwah) eme:

1. Sumbang Perkundul
   Kundul si supan eme muncayang (bersila). Jenari terdo (menjulurkan kedua kaki) di kune sekalak diberu paksa pepinemken ntah ngangkip anak. Jenari arus si tandai si mehangketa bagi mami, bengkila, turangku ras silih. La banci kundul petala-tala, ndeher ntah pedeges daging.
2. Sumbang Pengerana
   La banci melasken kata-kata si peturah nembeh ate kalak ntah banci nambahi imbang.
3. Sumbang Pengenen
   Lit bagin-bagin i bas kula jelma si pantang ipernehen alu sengaja.
4. Sumbang Perpan
   Tupung man la banci “ngkulcap” (terbegi sora tupung man) bage pe la banci merimah (nakan ndabuhen kudarat pinggan).
5. Sumbang Perdalan
   Tupung erdalan ula metumbur (ceroboh). Nahe ras tan ula iayun.
6. Sumbang Pendahin
   Dahikenlah si mehuli dingen erguna bage pe la nganggu ketenengen kalak si deban.
7. Sumbang Perukuren
   I bas nggeluh ras jelma si enterem, kita arus si ergan ras si hamaten bage pe ula rukur la mehuli nandangi kalak si deban.
8. Sumbang Peridi
   La banci ridi radu i bas sada ingan ras si mehangketa umpamana mama ntah silihta.
9. Sumbang Perpedem
   La banci medem i bas sada ruangen ras si mehangketa umpamana adi si dilaki ras mama, mami silih ntah turangkuna. Adi si diberu ras bengkila ntah turangkuna. Anak perana ras nande ntah turangna. Singuda-nguda ras bapa ntah turangna.

Rikutken 1 Timotius 5:1-8 bage pe filosofi Karo ras orat geluh kalak Karo, mari dage kita nggeluh rorat ula rarat. Kalak si erkiniteken dingen erbudaya, geluhna rorat. Mehuli ia kempak kalak si deban dingen nggit nampatisa. Emaka geluhna tuhu-tuhu ernanam kempak kalak si deban. Erkiteken geluhna pelin-pelin i bas kekelengen.

SERAYAN TUHAN/BAPA/NANDE NURIKEN TEKS

NURIKEN PENGGEJAPEN

• SIMADA JABU
• MAMRE
• MORIA

ADI ILAKOKEN I BAS JABU DI KUNE BAPA NURIKEN TEKS PUSTAKA
SI BADIA, MAKA SI NURIKEN PENGGEJAPEN EME NANDE, BAGEM
SEBALIKNA

DISKUSI/SHARING/CERAMAH/AKSI

1. I bas sumbang si siwah, si apai nge megati la sidalanken?
2. Si cakapken erbahan ceramah budaya, banci i bas sektor banci pe i bas runggun (judul/materi, waktu bage pe narasumberna).

MOMO

RENDE: KEE. 296 – “MAN BANDU YESUS TUHANKU” (PERSEMBAHEN)

Man baNdu Yesus Tuhanku, ku endesken geluhku
Nggeluh si keleng-kelengen. Nggit si sampat-sampaten

Erbuah kata ni suan, bas kita anak Tuhan
Erbuah kata ni suan, bas kita anak Tuhan

Mediate ras mesayang, si m’uli ula sungsang
Tetap si ajar-ajaren, la si togan-toganen

PERTOTON SYAFAAT

• Kerna persembahen ibabai Mamre/Bapa.
• Kerna ngawan perpulungen gelah tetap meteh orat geluh ibabai Mamre/Bapa.
• Gelah gereja tetap banci menggali, melestariken ras mpelimbarui budaya ibabai Saitun/Anak
• Kerna Lembaga-lembaga adat gelah tetap banci melestariken budaya ibabai Pengurus PJJ/Anak
• Si turah i bas perpulungen ibabai Serayan Tuhan/Nande

RENDE: KEE. 191 – “IBAN KELENGNDU E”

Iban kelengNdu e, iban liasNdu e, la ku bene
Aku idilo Kam, ban lias ateNdu, ku surga e
Tergejap me tuhu, penegu-neguNdu, senang aku
Mejuah-juah me, ras isi jabu pe, liasNdu nge

PERTOTON TUHAN IBABAI SERAYAN TUHAN/BAPA

JEDA RAS PENUTUP

Pdt. Christoper Sinulingga, M.Th.