Bahan PJJ 30 Mei – 05 Juni 2021

May 31, 2021 Author Dua PJJ Sektor, Sektor Betlehem, Sektor Filipi, Sektor Galilea, Sektor Hermon, Sektor Kana, Sektor Korinti, Sektor Roma, Sektor Yerusalem 0

KERINA TAMA KEMULIAN MAN DIBATA

(Budaya/Modern)

1 Korintus 10: 23 – 33

10:23 “Segala sesuatu diperbolehkan.” Benar, tetapi bukan segala sesuatu berguna. “Segala sesuatu diperbolehkan.” Benar, tetapi bukan segala sesuatu membangun.
10:24 Jangan seorangpun yang mencari keuntungannya sendiri, tetapi hendaklah tiap-tiap orang mencari keuntungan orang lain.
10:25 Kamu boleh makan segala sesuatu yang dijual di pasar daging, tanpa mengadakan pemeriksaan karena keberatan-keberatan hati nurani.
10:26 Karena: “bumi serta segala isinya adalah milik Tuhan.”
10:27 Kalau kamu diundang makan oleh seorang yang tidak percaya, dan undangan itu kamu terima, makanlah apa saja yang dihidangkan kepadamu, tanpa mengadakan pemeriksaan karena keberatan-keberatan hati nurani.
10:28 Tetapi kalau seorang berkata kepadamu: “Itu persembahan berhala!” janganlah engkau memakannya, oleh karena dia yang mengatakan hal itu kepadamu dan karena keberatan-keberatan hati nurani.
10:29 Yang aku maksudkan dengan keberatan-keberatan bukanlah keberatan-keberatan hati nuranimu sendiri, tetapi keberatan-keberatan hati nurani orang lain itu. Mungkin ada orang yang berkata: “Mengapa kebebasanku harus ditentukan oleh keberatan-keberatan hati nurani orang lain?
10:30 Kalau aku mengucap syukur atas apa yang aku turut memakannya, mengapa orang berkata jahat tentang aku karena makanan, yang atasnya aku mengucap syukur?”
10:31 Aku menjawab: Jika engkau makan atau jika engkau minum, atau jika engkau melakukan sesuatu yang lain, lakukanlah semuanya itu untuk kemuliaan Allah.
10:32 Janganlah kamu menimbulkan syak dalam hati orang, baik orang Yahudi atau orang Yunani, maupun Jemaat Allah.
10:33 Sama seperti aku juga berusaha menyenangkan hati semua orang dalam segala hal, bukan untuk kepentingan diriku, tetapi untuk kepentingan orang banyak, supaya mereka beroleh selamat.

10:23 Lit kalak ngatakenca, “Kai pe banci ilakoken.” Tuhu, tapi labo kerina erguna. “Kai pe banci ilakoken,” tapi labo kerina pehuliken.
10:24 Ola ise pe ngukuri untung man bana saja, tapi inget pe ngukuri untung kalak si deban.
10:25 Kerina daging si idayaken i tiga banci ipanndu alu la pada nungkun-nungkun i bas pusuh peratenndu.
10:26 Sabap i bas Pustaka Si Badia lit tersurat, “Doni enda ras kerina isina Tuhan empuna.”
10:27 Adi sekalak si la tek man Jesus Kristus ndilo kam man ras-ras, janah tetap ukurndu ndahisa, panlah kai si idangkenna man bandu alu la pada nungkun-nungkun pusuhndu.
10:28 Tapi adi lit kalak si ngatakenca man bandu, “Pangan enda enggo ipersembahken man berhala,” ola pan pangan e erkiteken kalak si ngatakenca man bandu e dingen erkite-kiteken penggejapen i bas pusuh si la tetap.
10:29 Labo penggejapenndu, tapi penggejapen kalak si ngatakenca man bandu e. Banci jadi lit kam ngataken, “Engkai maka penggejapen kalak si deban jadi hakim nandangi kebebasenku?
10:30 Adi ngataken bujur nge aku man Dibata kerna pangan e, ngkai maka ipandang kalak aku, sedangken kukataken nge bujur man Dibata kerna pangan e?”
10:31 Dage kerina si ilakokenndu, subuk man ntah minem, bahanlah si e kerina tama kemulian man Dibata.
10:32 Ola ibahanndu kitik ukur kalak, subuk kalak Jahudi ntah kalak perbegu ntah pe perpulungen Dibata.
10:33 Bagi aku, kupala-palai erbahan si ngena ate kalak kerina i bas kerina si kubahan. Labo keuntungenku si kudarami, tapi keuntungen kalak si nterem, gelah ia terkelin.

PERSIKAPEN

  • Pengurus PJJ ngaturken perdalanen PJJ subuk kune ilakoken i bas Sektor, jabu kepkepen, entah i bas jabu ngawan perpulungen erkiteken situasi.
  • Nikapken ingan persembahen ras pertoton syafaat
  • Adi i bas sektor entah jabu kepkepen perdalanen PJJ ibabai Pt/Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
  • Kerina perdalinenna rikutken situasi janah banci iubah (imodifikasi).
  • Sope benaken PJJ banci kita rende Lagu KAKR

RENDE: KEE. 338 – ULU TUAH KAM KUSEMBAH

Kam kusembah, ulu tuah, Ajar aku me gelah
Lah nurihi pujin kami, lalap la ‘ngadi-ngadi
Lias ras keleng ateNdu, jujurkenNdu man bangku
Nteguh paguh la terundu, Kuasa ras muliaNdu

Pasu-pasu surga nari, kugejap tiap wari
Kepentaren berekenNdu, nehken sura-suraNdu
PakekenNdu lah min aku, jadi persuruhenNdu
Jenda aku, suruh aku, nehken kekelengenNdu

ERTOTO ( IBABAI SIMADA JABU)

NGOGE KATA DIBATA (IBABAI SIMADA JABU)

RENUNGAN

Kalak sierkiniteken man Tuhan Jesus teridah arah orat geluhna. Orat geluh kalak si erkiniteken sue ras tema renungen PJJ sekali enda ‘kerina tama kemulian man Dibata’. Enda me siisehken rasul Paulus man perpulungen Korinti “Dage kerina si ilakokenndu, subuk man ntah minem, bahanlah si e kerina tama kemulian man Dibata” (1 Kor. 10:31). Paksa si e turah persoalen i tengah-tengah perpulungen Korinti. Lit piga-piga anggota perpulungen si tetap denga ikut muat bagin i bas nembah man berhala – berhala, erlualua bage pe kesemalen-kesemalen siilakoken kalak perbegu. Tangkas ituriken rasul Paulus “Dage si ku maksud e me kai si ipersembahken i babo batar-batar persembahen berhala, labo ipersembahken man Dibata, tapi man setan-setan nge. Janah ateku min ola kam ersada ras setan e. La banci kam minem tare calung Tuhan jenari minem ka tare calung setan. La banci kam man i bas meja Tuhan jenari man ka i bas meja setan-setan” (1 Kor. 10: 20- 21). Orat geluh kalak si erkiniteken tuhu-tuhu encidahken orat geluh si badia erkiteken enggo ipebadiaken alu dareh Kristus. Alu bage, si jadi sukat-sukat siisehken rasul Paulus gelah kerina tama kemulian man Dibata:

  • Kai-kai saja pe siilakoken, lakokenlah si erguna, pehuliken, la ngukuri untung man bana saja, tapi inget pe ngukuri untung kalak si deban.
  • La erbahan kitik ukur kalak si deban.
  • Erpala-pala erbahan si ngena ate kalak kerina gelah ia terkelin.

Renungen PJJ sekali enda ikawitken ku bas orat geluhta selaku kalak si erbudaya. Antusen kata erbudaya, eme kata kerja, palas katana eme ‘budaya’ (kata benda) eme asal katana buddhayah i bas bahasa Sansekerta nari, bentuk jamak i bas buddhi nari, si ertina akal ntah pe pikiren. Jadi budaya eme ngerana kerna kai-kai saja si lit hubungenna ras pikiren manusia, perbahanenperbahanen manusia ras ulih (karya) pikiren manusia si teridah arah barang-barang si lit. Manusia me si mbelinna muat bagin i bas budaya. Selaku anggota perpulungen GBKP perlu kel kita metenget ras megermet kerna budaya si lit isekelewetta. Tangkas kel ituriken kerna perbahanen GBKP nandangi budaya erpalasken konfesi GBKP eme “…dalam terang firman Allah, manusia harus menggali, mengembangkan dan melestarikan budaya secara positif, kritis, kreatif dan realistis untuk kesejahteraan manusia (1 Korintus 9: 20- 21; Johanes 13:1-20). Ertina, GBKP labo anti nandangi budaya ras labo ka ngaloken bage bage saja budaya si lit. GBKP erpalasken terang kata Dibata (erkiniteken) nggargari, niksiki ras makeken budaya si lit (erbudaya) guna mpermuliaken Dibata ras maba kejuah-juahen man manusia. Siperlu silakoken nandangi budaya:

  • I bas budaya kalak Karo, lit kesemalen nggeluh sisampatsampaten. Kai pe dahin irasken alu runggu. Enda tuhu sendalanen ras kata Dibata. Budaya si perayakenna guna tama kiniulin ras erguna man kerinana tetap silakoken. Tapi perlu kita megermet erkiteken lit denga ka nge si ngelakoken kesemalen erpalasken kiniteken agama pemena. Umpamana: nehken cibal-cibalen man kalak si enggo mate, nehken toto man kalak si enggo mate, ngoge tanda-tanda/gerek-gerek, ntah mpergunaken mangmang/tabas, make guna-guna, erpangir ku lau, erdukun, niktik wari, ndilo wari udan, nengget, perumah begu, pengelaris, ras si debanna. Si enda kerina arus iterangi alu kata Dibata, sabab enda la mpermuliaken Dibata.
  • Budaya Modern ntah pe megati ikataken budaya populer eme kebiasan sue ras kemajun zaman ras perkembangen Ilmu pengetahuan, teknologi, industri dunia hiburan, media massa, ras si debanna. Tuhu mbue maba kiniulin ku bas kegeluhen manusia tapi pe adi la kita beluh ngaturkenca banci ncedaken kegeluhenta. I bas si enda me kita perlu metenget i bas ngalaken budaya populer, tentuna lit dampak positif ras negatif nandangi kegeluhen perpulungen. Budaya populer enda pe banci erbahanca nilai-nilai budaya Karo reh urakna, perdalinen peradaten si enggo mekarus, meros. Cakap Karo pe iakapna enggo ketadingen/sempit, piahna banci saja anak-anakta lanai ietehna bahasa Karo, uga nina banci engkelengi budaya Karo adi cakap Karo pe la ietehna?

Mari dage tetap jadiken kata Dibata jadi sukat-sukat i bas kaikai saja pe si ilakoken kita. Siukurken lebe, sisik-sik lebe “tama kemulian man Dibata kin sikulakoken enda? Erguna, pehuliken, nge man bangku ras man kalak si deban ras la erbahan kitik ukur kalak si deban?” Adi enggo payo, emaka erpala-pala kita ngelakokenca, kerinana guna kemulian Dibata (Soli Deo Gloria).

NURIKEN PENGGEJAPEN

  • SIMADA JABU
  • MAMRE
  • MORIA
  • PERMATA
  • Irakut Serayan

DISKUSI

  1. Turiken, i bas dampar kai-kai saja iakapndu Budaya (Karo ras Modern) nggo mpermuliaken Dibata?
  2. Turiken, i bas dampar kai-kai saja iakapndu Budaya (Karo ras Modern) si man pekenan gelah ipakeken guna mpermuliaken Dibata?

MOMO: Isehken Pengurus PJJ

RENDE: KEE. 289 – LALAP SIKATAKEN BUJUR

Lalap sikataken bujur. Beritaken kemulianNa
Mbelin pemereNa banta. Puji gelarNa
Reff. Dibata kap cilinggementa, malem ateta
Tuhan Dibata Penalementa.
Penanam-nanam bas geluhta

PERTOTON PERSEMBAHEN RAS SYAFAAT

  • Gelah perpulungen erkemalangen man Dibata Si Tonggal saja.
  • Gelah perpulungen reh ngasupna mpermuliaken Dibata arah pemeteh ras buatenna lit.
  • Si turah i bas si mada jabu…, perpulungen,… bangsa ras negara…

RENDE: KEE. 249 – AJAR AKU O TUHANKU

Ajar aku o Tuhanku, make kata ras pedahNdu
Kueteh payo ras sentudu, kuikutken bas geluhku
Reff. Singikut pedah Dibata, daten me kerembakenNa
Pedah kata tangkas k’rina, em jadi gelementa.

PERTOTON TUHAN
JEDA RAS PENUTUP

Pdt. DR. Kalvinsius Jawak

Post Views: 483