Bahan Renungan Pekan Penatalayanan 5

“Tetapkenlah Ukur Dingen Tek”
Ulangen 31: 7 – 8

(31:7) Lalu Musa memanggil Yosua dan berkata kepadanya di depan seluruh orang Israel: “Kuatkan dan teguhkanlah hatimu, sebab engkau akan masuk bersama-sama dengan bangsa ini ke negeri yang dijanjikan TUHAN dengan sumpah kepada nenek moyang mereka untuk memberikannya kepada mereka, dan engkau akan memimpin mereka sampai mereka memilikinya.
(31:8) Sebab TUHAN, Dia sendiri akan berjalan di depanmu, Dia sendiri akan menyertai engkau, Dia tidak akan membiarkan engkau dan tidak akan meninggalkan engkau janganlah takut dan janganlah patah hati.”

I. KATA PERLEBE

Selaku pemimpin tentuna lit paksa menaken ndahiken dahin lit ka paksana ngujungi dahin. Pemimpin perlu meteh dingen ersikap ngaloken paksa lanai mimpin, subuk erkiteken aturen organisasi siikataken periodesasi ntah pe erkiteken faktor umur si nggo metua, nggejabken nggo lanai megegeh dingen nggitna mengkader kalak singuda denga tentu pempimpin sibage eme pemimpin si ertanggungjawab. Pengendesen dahin penting dingen melala ertina. Pengendesen dahin sada pengendesen si isehken man kalak si deban guna nerusken dahin alu pengarapen reh majuna dingen reh terulin dahin e. Singaloken dahin pe tentuna megah dingen meriah ukurna ngaloken dahin amin pe lit ka nge perbeben guna ndahikenca, lit tantangan subuk secara pribadi bage pe si reh arah dampar si deban. Pekan penatalayanen wari pelimaken enda mari si nen uga Musa ngendesken dahin man Josua jadi pemimpin guna mabai bangsa Israel bengket ku taneh Kanaan.

II. ISI

2 Korinti 8:10-12, Rasul Paulus ncidahken perbahanen perpulungen Makedoni. Gia ngenanami kiniseran simesangat tapi keriahenna simpar dingen kemusilenna si la teralang e erbahanca ia melumbar mere. Ikut muat bagin nampati kalak Kristen si i Judea. La terjeng nggit nampati tapi pe iendeskenna dirina man Tuhan. Alu ncidahken perbahanen perpulungen Makedoni iajuk Paulus perpulungen Korinti gelah ndungi dahin si enggo ibenaken i bas tahun sinderbih. Dahin kai kin e? E me dahin i bas nampati. Dahin si enggo ibenaken iajuk gelah iterusken dingen dungi dahin e alu ergiah-giah bagi ergiah-giah nai menakenca. Dahin e banci idahiken arah ukur ersuruh guna mere. Dahin pelayanen ibenaken ras tetap idahiken janah paksana idungi. Kerina e jadi adi lit ukur ersuruh ntah pe kininggiten mere diri guna ndahikenca.

Ulangen 31:7-8 ituriken kerna Musa e me pemimpin bangsa Israel darat iperbudaken Mesir nari nuju ku taneh perjanjin e me taneh Kanaan. Paksa i Kades lit kelepaken Musa si erbanca la banci bengket ku taneh si ipadanken Tuhan. Erkiteken la lit lau jungut-jungut bangsa Israel man Musa ras Harun. Erjimpuh ia duana, ayona seh ku taneh, jenari teridah sinalsal terang Tuhan teridah man bana. Ngerana Tuhan man Musa segelah muat ciken ras ngerana man batu gelah reh lau ergeruguh i bas nari man inemen bangsa Israel ras man asuh-asuhen. Musa la terjeng ngerana saja rikutken siiperentahken Tuhan tapi iangkat Musa cikenna ipaluna batu e dua kali alu ciken e, jenari mbincar me lau mbelin ergeruguh ndarat, emaka kerina bangsa e ras asuh-asuhen minem. Tapi irawai Tuhan Musa ras Harun nina: “erkite-kiteken la cukup kinitekenndu ernalem i bas kuasangKu si badia i lebe-lebe bangsa Israel, emaka la banci ibabandu ia bengket ku negeri si enggo Kupadanken e (bdk. Bil.20:7-12).

Paksa umurna 120 tahun igejabkenna nggo lanai ngasup mimpin bangsa Israel nggo kurang gegehna. La ceda ukurna i bas gegehna sikurang tapi ipetetapna ukur bangsa Israel alu ngataken Tuhan Dibata sitetap nemani perdalanen bangsa Israel, singkernepken bangsa-bangsa sitading i taneh si man dapeten maka banci iingani bangsa Israel negeri e. Josua jadi pemimpinndu sue ras siikataken Tuhan. Selaku pemimpin si nandangi ngadi Musa ncidahken tanggungjawabna mereken pengendesen dahin man Josua dingen mpetetap ukur Josua alu ngataken “tetapkenlah ukurndu janah teklah; kam me si mabai bangsa enda guna ndatken negeri siipadanken Tuhan man nini-ninina.

Ipilih jadi pemimpin i bas sada dampar banci mereken kemegahen tapi i bas dampar si deban banci mereken perbeben ndahikenca. Mabai perdalanen bangsa Israel bengket ku taneh Kanaan melala singelawan, kalak Amori, raja Moap, kalak Jeriho (bdk. Jos. 24:8-12). I bas ayat 8: tole ikataken Musa man Josua, Tuhan kap si mabai kam ras nemani kam. Gia lit si man alanken i bas ndahiken dahin e, Tuhan saja jadi gegeh situhu-tuhu. La juru dingen la itadingken Tuhan emaka la bene ukur ras la mbiar. Tuhu kai siikataken Musa man Josua ras man bangsa Israel e jadi. Bangsa Israel bengket ku taneh Kanaan iteruh kepemimpinen Josua, si e kerina jadi erkiteken Tuhan si nampati.

III. PENGKENAINA

I bas Tata Gereja GBKP kerna masa pelayanan BPMR, masa jabatan BPMK, masa jabatan Moderamen eme 5 tahun (nen. Tata Gereja GBKP tata laksana H. organisasi BAB XXXIII Pimpinan pasal 138 point 4, Pasal 139 point 5, pasal 140 point 5). Periodesasi periode tahun 2014-2019 nggo ka ibentasi, erkiteken si e i bas tahun 2020 ilakoken ka me pemilihen nandangi pimpinen simbaru i bas gerejanta GBKP rikut pe kepengurusen i kerina wilayah tingkat pelayanan GBKP. Periodesasi ilakoken guna menatalayanken perdalanen organisasi gereja, kesempaten ngevaluasi ras mere peluang kaderisasi kepemimpinen alu tujun reh ulina perdalanen dahin tri tugas gereja. I bas dampar si deban periodesasi pe banci tole mere rumat ras kesempaten “mengupgrade” diri nandangi siterpilih i bas ngelai, segelah gerejata tole banci jadi pasu-pasu man doni enda. Mbelin pengarapenta kerina gelah siterpilih jadi pemimpin i bas gerejanta e me kalak situhu-tuhu nggit ngelai alu meteruk ukur, tutus dingen mbiar man Tuhan saja. Nggejabken maka dirina la serta idep-adepen Tuhan, tetap mindo kepentaren, pergegeh arah Tuhan nari. I bas Kebaktin Pekan Penatalayanen GBKP tahun 2020 wari pelimaken enda isingetken me dahin enda man banta alu bage ngawan perpulungen pe nggit muat bagin dukung tersehina pelaksanaan pemilihen pemimpin gereja i bas kerina wilayah pelayanan subuk arah toto ras penampat.

Tetapkenlah ukur dingen teklah, kata pengendesen si isehken Musa man Josua, bage ka pe bas periodesasi si nandangi ilakoken, kerina siterpilih jadi Moderamen GBKP, Badan Pekerja Majelis Klasis, Pengurus kategorial pusat, Pengurus kategorial klasis bage pe pengurus unit-unit, ngaloken dahin e alu pusuh si ernalem man Tuhan. La lit kebiaren gia lit tantangen, la erdele ate gia melala pengorbanen. Tetap pindo gegeh ras kepentaren i bas Tuhan nari segelah ngasup ndahiken dahin pelayanen alu mehuli. Runggun gereja peberkat utusen ngikuti Sidang Sinode ras sidang klasis. Ngawan perpulungen pe notoken pelaksanaan pemilihen Moderamen GBKP, BPMK ras pengurus-pengurus kategorial ras unit-unit pelayanen GBKP. Di kune ipindo penampat guna dukungen dana mari si sehken alu ergiah-giah arah ukur ersuruh bagi kai silakoken perpulungen Makedoni i bas kemusilenna pe muat bagin nampati perpulungen Judea. Erdalan kerina pelaksanaan pemilihen ras reh mbelinnalah GBKP banci jadi aron Dibata guna jadi pasu- pasu man doni enda. Terpuji gelar Tuhan. Amin